::: قصة مجنون سارة ::: [الأرشيف] - منتديات منطقة حائل

زينب محمد

07-07-2007, 07:34 PM

السلام عليكم ورحمة الله وبركاته

اليوم انقل لكم قصة جديدة رائعة هي قصة

:: مجــــــــــــــــــنون ســــــــــــــــــــــــــــــــارة::

للكــــــــــــــاتبة : فـــــــــــــــاتنة دبـــــــــــــــــــــي

وان شاء الله تعجبكم مثل ما أعجبتني ..

يلا نبدأ بسم الله ..

الجــــــــــــــزء الاول:

كانت سارة دلوعة اهلها والكل يحبها وكانت تتمتع باجمل الصفات من جمال واخلاق طيبة وذكاء واما جمالها فخلوه على صوب لانها صدق كانت قمر ..كل اللي يشوفها يتخبل على جمالها .. وهي عمرها 19 سنة يعني في اول سنة جامعة وعندها صديقة روح بالروح وياها وهي ريم لان سارة كانت وحيدة فعشان جذي تعتبر ريم اختها وصديقتها وكل شيء بالنسبة لها ..

والقصة تبتدي:

ام سارة : حبيبتي سارونه وينج سارة

سارة : هلا امي انا بغرفتي
طلعت سارة من غرفتها عشان تشوف امها شو تريدها
ام سارة: وينج سارة من متى اناديج حبيبتي
سارة : امي كنت اكلم ريم ربيعتي .
ام سارة وهي تضحك : والله اني اغار من هالريم . كل وقتج وياها
ضحكت سارة وحضنت امها وقالت : محد مثلج يا أحلى واروع ام بالعالم ام سارة : يالله خلي عنج هالكلام اقول حبيبتي سارونه لاتنسين عزيمة خالتج لنجاح بنتها نورة من الثانوية
سارة : اكيد امي مب ناسية افا وانا اقدر انسى نجاح نورة .
وراحت سارة واتلبست ولبست احلى ما عندها واتمكيجت بمكياج خفيف وبسيط
ام سارة : دخلت على سارة تشوفها خلصت والا لا
وشافت ام سارة سارة بجمالها وكشختها وقالت لها : ماشاء الله عليج يا بنتي طالعة مثل القمر اقري على عمرج يا بنتي اخاف يحسدونج
ساره وهي مبتسمة : على شنو يحسدوني امي
ام سارة : سارونه بلا حركات تعرفين انج حلوة والكل يمدح فيج من صغرج
سارة : اكيد لاني طالعة على امي حبيبة عمري

صدقها الام لان سارة مب بس حلوة بل فاااااتنة.. شعرها البني على العسلي وعيونها العسليات الحلوات الوساع اللي كأنها عيون الغزال وجسمها كان صدق متناسق كانها عارضة أزياء .

ام سارة: يلا خلي عنج هالكلام ويلا نروح تأخرنا الدريول يتريانا في السيارة
وراحو كلهم العزيمة
وكانت سارة احلاهم
ويت سارة وسلمت على بنت خالتها نورة وباركتلها على نجاحها
نوره : زين ييتي شنو هالتأخير كله ؟
سارة : بعد تعرفيني يوم اختار بدلة ولبس كيف اتأخر
نورة : بس ماشاء الله عليج طالعة قمر .. غطيتي علي ..
وضحكت سارة
وقالتلها سارة : محد يغطي على رقة وحلاة بنت خالتي نورة
ويت من وراهم هند اللي هي بعد بنت خالتها يعني اخت نورة وهند اكبر عن سارة بسنتين وهي تغار من ساروه وايد لانها احلاهم والكل يحبها ويحترمها
يت هند وقالت لها مب من خاطرها " هلا سارة
سارة : هلا ببنت خالتي هند شنو اخبارج واخبار الدوام
هند : اكيد تمام
وراحت عنها هند
ساره وهي مستغربة : بلاها هند ليش متضايقة ؟
نورة : لا حبيبتي هند ما فيها شيء بس تعرفين كيف تفكر وهي تعرفينها من صغرها تغار منج
سارة : ليش تغار ..؟ هند حلوه وزينه
نورة : بعد تعرفين البنات وغيرتهم
المهم خلصت الحفلة والاغلبية راحو البيت الا سارة وامها
وكانوا يتكلمون ويضحكون وفجأة دخل ولد خالتها اللي هو اخوهم خالد
خالد كان اكبر اخوانه وكان طيب وخلوق ووسيم وكل البنات متخبلين عليه ويتريون نظره منه بس هو قلبه مب ملك أحــد غير (ســــارة).
بعد ومن صغره كان متيم في سارة مب بس متيم بل يموت فيها ..
دخل شاف سارة .. وكان يشوفها بنظرات وحب ويقول في خاطره : سارة هني واخيرا وينج يا نبض قلبي وينج عني
والكل لاحظ نظراته
ونورة قالت : الناس يسلمون يا خالد
ام خالد : وين وصلت يا خالد ؟
هند اختهم : هه هه هه اكيد عيونه على حبيبته سارة .
وكانت هند تشوف سارة بنظرات كلها غيرة

سارة استحت واحمرت ونزلت رأسها .
خالد بعد استحى ودعى على هند في خاطره
خالد : السلام عليكم اشحالج بنت خالتي سارة
سارة : الله يعافيك خالد انت شنو اخبارك .
ام سارة : بس سارة ونحن وين رحنا
ضحكوا كلهم على خالد لان ما كان يشوف الا سارة
وخالد أبد ما كان يتكلم لانه بس يريد يشوف حبيبته سارة .
وقالها وهو يشوفها من فوقها لين تحتها .
خالد : ما شاء الله عليج يا بنت خالتي طالعة اليوم ملاك .
سارة صدق ويها محمر : عيونك الاحلى بس عاد لا تبالغ
خالد : وربي ما ابالغ المينون اذا شاف جمالج راح يصحى

نورة : عيل خلا نودي سارة مستشفى الميانين عشان كلهم يصحون ويستوون زينين .
وهني الكل تم يضحك
بس خالد كان تفكيره كله في سارة .
ام سارة " يلا عن اذنكم بنروح البيت الوقت تأخر
ام خالد : وين تو الناس بعدنا ما شبعنا منكم
ام سارة : الود ودنا نتم لين الفير بس ما يصير
سارة : اكيد القعدة وياكم ما تنمل يا خالتي
كلهم وقفوا وراحوا يسلمون علشان يطلعون وبعد ما وصلت سارة عند خالد
وهي منزلة رأسها : مع السلامة يا ولد خالتي
خالد وعيونه على سارة : مع السلامة يا القمر اووووه قصدي يا بنت خالتي
وعلى طول سارة طلعت لانها صدق استحت وما تعرف كيف ترد على كلمات خالد العذبة .
وبعد ما وصلت سارة البيت

كانت تفكر في ولد خالتها خالد ونظراته وكلماته الساحرة .
اما خالد فكان هاليوم احلى يوم عنده وفرحان لان شاف حبيبته سارة لانه من هو صغير يحبها ..
وراح عند امه بأخرالليل

وتم يدق الباب على غرفه امه
خالد : امايه امايه افتحي الباب
ام خالد مستغربة : خالد شوفيك وين يعورك شو فيهم خواتك ..؟
خالد : باسم الله عليج امي ما فينا شيء
ام خالد : عيل ليش ياي هالوقت تعرف الساعة كم ؟
خالد : هي الساعة 2 ونص شو يعني .. المهم امي الله يخليج ابي اقولج شيء
ام خالد فتحت الباب وهي مستغربة من خالد وتشوفه بنظرات غريبة
ام خالد : قول اللي عندك يا خالد شنو فيك ؟
خالد امي تعرفين اني احب سارة بنت خالتي من صغري ويا الوقت اللي تخطبينها لي امي اخاف احد يأخذها مني واذا احد خذاها بموت يا امي تعرفين شنو يعني بموووووووت .
ام خالد وهي تضحك على خالد : باسم الله عليك من الموت يا خالد
الله ياخذ بليسك يا خالد موعينا هالوقت علشان هالسالفة .. لا تخاف سارة ان شاء الله ما بتكون الا لك
خالد: ابيج تكلمين امها باجر اوكي
ام خالد : خلاص
°
°
°
°
°
°يتبــــــــــــــــــــــــــــع

زينب محمد

07-13-2007, 09:38 PM

http://www.al-wed.com/pic-vb/88.gif

:::///::: الجزء الثاني :::///:::

وفي اليوم الثاني قامت سارة وراحت عند امها
سارة : صباح الخير يا أحلى واغلى ام بالعالم
ام سارة وهي مبتسمة : صباح النور يا احلى سارة او قمر على قولة خالد وتمت الام تضحك ..

سارة وهي منحرجة : امايه عاد ليش تضحكين لا تعلقين على كلام خالد ولا هو جذب يوم قالي قمر
الام : هههههه لا يا بنتي ما اضحك على كلامه بس اضحك على حبه صدق عيال هالايام حبهم غير.
وتمت سارة تضحك على كلام امها .
وفجأة رن موبايل سارة :
سارة : الو
ريم صديقتها : هلا سارونه هلا بصديقة عمري
سارة : هلا وغلا بالغالية
ريم : شو اخبارج ؟؟ وينج البارحة ما عبرتينا ولا دقيتي علي تعرفيني ما اقدر على بعدج
سارة: كنا معزومين على نجاح نورة بنت خالتي .
ريم : هاااااااااا اشوف بعض الناس ما عبرونا لازم اكيد شافوا الحبيب حبيب الألب.
سارة : بسج عاد لا تذكريني .ترى اخاف اسرح فيه
ريم : يا ويلي على الحب ..
سارة وهي مستحيه اونها : احم احم
ريم : سارونه حبيبتي تعالي اليوم بيتنا بنتغدى وبعدين بنروح سيتي سنتر علشان نتشرى اوكي
سارة : اوكي بس غريبة شو تبين تشرين وليش؟
ريم : يعني محد يروح السوق الا اذا شيء مناسبة
سارة : لا بس مستغربة مب من عوايدج قولي ريم شو عندج
ريم : امممممممممممممم الصراحة ابي اشتري اشياء حق اخوي اللي يسوى عندي كل شيء اخوي فهـــــد
سارة : فهد ؟(وعلامة تعجب في ويها) ..
سارة : بس فهد مسافر حق الدراسة
ريم : حبيبتي فهد خلص الدراسة يا صباح الخير لا انتي دارية لا فيا ولا في اخوي
سارة: وانا شو عرفني في اخوج اصلا انا ما شفته ولا مرة
ريم : يالله بسج رمسة تعالي بيتنا الحين سمعتي الحيـــــــــــــــن .
سارة : زين باسم الله شو فيج محرجة خلاص الحين بقول حق امايه

ريم : اترياج بسرعة لا تتأخرين
سارة : اوكي يلا باااااي
ريم : بااياااااات

سارة : امايه الحين بروح عند ريم يمكن ولا ؟
ام سارة : الحين افا يعني محد بيتغدى وياي
سارة : امي آسفة بس ريم تترياني
الام ونبرة حزن : تعرفين يا سارة انا ما ابي اخرب عليك طلعاتج بس مثل ما تعرفين اني مالي غيرج بحياتي . ابوج الله يرحمه توفى من خمس سنين يوم يتله نوبة قلبية لان كان فيه القلب وانا ما يبت غيرج وما عندي الا انتي واذا صارلج شيء وتمت تصيح الام ..
سارة والدمعة بعيونها : امايه انا بكون عندج لاخر حياتي لا تصيحين يا امي انا بكون وياج بس الله يخليج ما ابي اشوف دمعة بعيونج ترى دموعج غالية
الام( وهي تمسح دموعها) : اسمحيلي يا بنتي ما كنت ابي اضايقج في هالوقت بس تذكرت ابوج ..
سارة : في حد ما يتذكر ابوي .. اصلا ابوي كان دوم يوصيني عليج يا امايه .. وانا ما راح اخليج
.وراحت سارة وحضنت امها
ام سارة : يلا يا بنتي روحي عند ريم تترياج البنت .
سارة : لا خلاص بتم وياج
ام سارة : لا يا بنتي انا بروح عند خالتج فاطمة وانتي روحي عند ريم
سارة : اذا بتروحين بيت خالتي فاطمة خلاص يعني مطمنة عليج الحين اقدر اروح .
وراحت سارة اتلبست بسرعة وراحت بيت ريم صديقتها
اما ام سارة فراحت عند اختها فاطمة
ام سارة وهي داخلة بيت اختها
ام سارة : السلام عليكم
فاطمه اختها وبناتها نورة وهند وخالد: وعليكم السلام يا هلا والله
(اما خالد عيونه على الباب وفي خاطره يقول وينها وينها حبيبة العمر) .
نورة : خالو وين سارة ؟ليش ما يت وياج
ام سارة : سارة يا غناتي راحت عند ريم ربيعتها
خالد وهو متضايق ويقول في خاطره ( هذا وقت تروحين هناك )
خالد : يعني خالو هي بتروح وما بتي بعدين هني
ام سارة : ولا ما دري يا ولدي هي قالت بتروح ويا ريم وبعدين بيروحون يتشرون
هند وهي رافعة خشمها : بعد تروح السوق ويا ربيعتها وبروحهم بعد
ام سارة : ما فيها شيء يا بنتي هي ما راحت مكان غلط
ثانيا بنتي تروح ويا بنت محترمة وسارة ما تطلع الا بشيلتها وعباتها.
خالد : ثانيا يا هند لا تدخلين
نورة : لازم يدافع عنها
وخالد يشوفها من طرف عينه : نوووووروووه بتسكتين عني ولا ؟
خالد صدق كان معصب علشان كلام هند ولان ماشاف سارة
نورة : لا لا الله يخليك ما فيه على حشرتك خلاص سكتنا.

أما سارة فهي كانت ببيت قوم ريم
ريم وهي معصبة : سارونه ليش تأخرتي ..
سارة : اسمحيلي يا ريماني بس امي كانت تصيح وما رمت اروح عنها لين ما اواسيها .
ريم (وبويها علامه تعجب): ":ليش تصيح ؟
سارة ونبرة صوتها كلها حزن : تصيح على الوالد اللي راح .
ريم : الله يرحمه .اذا انتو جذي تقولون ومتضايقين هالكثر عيل انا شو اقول .. وراحت ريم ويلست على الكرسي وهي ميتة صياح .
سارة وهي خايفة على ربيعتها : ريم ريم شوفيج ليش كل هالدموع
(ريم وعيونها كلها حزن ودموع )
ريم : اصيح اصيح يا سارة لاني ييتيييييمة تعرفين شو يعني يتيييمة على الاقل انتي عندج امج الله يخليها بس انا انا انا ؟ وتمت تصيح
سارة : انتي شو يا ريم ؟؟؟عندج عمتج الله يخليها اللي ما تقصر وياكم عندج اخوج فهد .
ريم: محد يا سارة يقدر يأخذ مكان الوالدين انا فقدت امي يوم كان عمري ست سنين امي راااااحت بمرض السرطان وما حسيت بحنانها يا سارة وابوي من كثر ما هو متعلق بامي كان يسرع مثل الميانين وهو بعد مات بالحادث وفقدتهم اثنينتهم بنفس اليوم .. ااااااااه يا سارة ما تعرفين كيف اتألم ما حسيت بحنانهم ..
سارة وعيونها تدمع على ربيعتها : بس يا ريم عندج اخوج فهد الله يخليه لج.
ريم وتشوف سارة وعيونها محمرة من الصياح : فهد .. ههههههههههههه شو تنكتين فهد . فهد فهد؟؟
فهد يا سارة هو نص ميت .. فهد يا سارة كان اكثر واحد متعلق في امايه الله يرحمها كان يموت فيها ويوم فقدها صار له مرض نفسي لانه كان محتاج لحنانها وبعد ما خلص الثانوية سافر وكمل دراسته بالخارج عشان شوي ينسى .. فهد يا سارة اكثر واحد متعذب بس شو اقول انا .. ما عندنا حد يا سارة ما عندنا حد ..وراحت حضنت سارة وهي تصيح
سارة وهي بعد تصيح : ريم انا وياج انا اختج وامي هي امج يا ريم .بس الله يخليج لا تصيحين اطلبيهم الرحمة هذا قضاء الله وقدره .
مسحت ريم دموعها وقالت لسارة : اسمحيلي يا سارة يبتج هني وزدت همومج.
سارة : افا عليج يا ريمان .. اذا ما تشتكيلي انا بتشتكين لمنو ؟. انا يا ريم وربي اعتبرج اختي وحبيبتي وربيعة عمري
مسكت ريم يد سارة وقالتلها : الله لا يحرمنا من بعض
ويلا نروح نتغدى تراني ميتة يوووع .

واما في بنت فاطمة خالة سارة
ام سارة : يلا اسمحولي بروح البيت .
فاطمة : تو الناس يا اختي
ام سارة : أي تو الناس الحين الساعة 8 بروح اكيد غناتي سارة في البيت .يلا من رخصتكم .
نورة : بحفظ الله يا خالتي وسلمي على سارة وااااااااايد
هند : (وهي تشوف اخوها من فوق لتحت ): وانت يا اخوي ما تبي تسلم على حبيبة القلب
خالد وهو منقهر : مالج خص .
ودخل غرفته لان كان منقهر واااايد لان سارة ما يت اليوم .

والساعه 11 مساء
ام سارة : ها سارة شو ان شاء الله استانستي
سارة : اكيد امايه استانست واااايد
ام سارة : هي تذكرت بنات خالتج يسلمون عليج .
سارة :الله يسلمهم .. امممممممم اكيد الحين معصبين علي لاني ما رحتلهم
ام سارة : اكثر واااحد منقهر هو فار س الاحلام خالد.
وتمت الام تشوف سارة من طرف عينها وهي تبتسم
وسارة (وهي منزلة رأسها) .. ها شو أي أي أي أي خالد خالد
ام سارة وهي تضحك " شو فيج قاعده تقولين حروف الهجاء
وتمو يضحكون .

ام خالد راحت عند ولدها بغرفته تشوفه لانه من راحت ام سارة وهو ما طلع منها
ام خالد : خالد خالد انت واعي ولا نايم
خالد وهو منسدح على السرير: هلا امي لا واعي تفضلي
ام خالد : بلاك يا ولدي شو فيك ليش متضايق ؟
خالد " ما تبيني اتضايق وانا قايلج تكلمين خالو سعاد "
ام خالد وهي تستعبط : أي سعاد ؟
خالد : امايه الله يخليج لا تستعبطين يعني منو سعاد تراج ما عندج الا اخت وحدة اسمها سعاد ..
ام خالد :: هااااااااااااه قول ام حبيبة عمري ام القمر ام قلبي سارة
خالد ويشوف امه وهو يضحك " هي ام حبيبتي ساره "
ام خالد : شوف خالد انا كنت بكلمها اليوم بس شفت الوقت غير مناسب لان الكل قاعد ويانا بس اوعدك عن جريب راح اكلمها ولا تزعل يا خلودي .
خالد : اكيد امايه .. الله يخليج بسرعه كلميها
ام خالد : يالله عليك شو كثر حناااااان قلت لك خلاص بكلمها يالله خلني اروح انام لاني تعبانة اليوم
خالد وهو في نفسه يقول (ااااااااااااااااه يا امايه انا اللي تعبان من الحب)

http://www.al-wed.com/pic-vb/88.gif

:::///::: الجزء الثالث :::///:::

وبعد هاليوم اتصلت ريم من الصبح حق سارة وسارة في سابع نومة

ريم تتصل فيها
ريم : الو سارونه سارونه
سارة وهي معصبة لانه مخربين نومها وبتعب تقول : الو منو ؟
ريم : منو يعني انا ريمان
سارة : الله يهديج يا ريم تتصلين صباح الله خير في هالوقت
ريم : أي صباح الله خير الحين الساعه 11 قومي بسج رقاد
سارة : شو تبين خلصيني والله فيه نوم
ريم :ساروه اليوم نحن معزومين على بيت قوم لطوف ربيعتنا وكل بنات المدرسة بيروحون هناك يعني وناسة .
سارة وفجأة نشت من المخدة : والله صدق رووووعة يعني بنات المدرسة بيجتمعون صدق وناسه بنتذكر ايام المدرسة
ريم : هي والساعة 8 نكون هناك وانا ابي اروح عشان اشتري بدلة حلوة لهالمناسبة لان الكل بيكون موجود ابي اتكشخ .
سارة : ليش يا حلوة ما عندج بدلة يعني
ريم : لا عندي طبعا بس ابي اشترلي بدلة يديدة .. شو بتين وياي ولا ؟
سارة : اكيد بيي ومرة وحدة اشترلي بعد
ريم : خلاص عيل تعالي بسرعة لا تنسين
سارة : لا حبيبتي البارحة ما تغديت ويا امايه حرام ما تهون علي بيي العصر وبنتشرى اوكي .
ريم: خلاص حبيبتي اشوفج على خير بس تعالي بسرعة عشان نلحق اوكي بااااي
وسكرت سارة من ريم وراحت عند امها تستشريها وطبعا الام وافقت .

(بيت فاطمة خالة سارة )
نورة : والله احس من زمان وما شفت بنت خالتي الغالية سارة .
هند وباستهزاااء : يعني شو من زمان من اسبوع كانت هني .
نورة : تعرفيني متعودة عليها ولازم اشوفها
بروح اتصل فيها .
هند: روحي روحي وانا بروح اتصل في منى
نورة : انا منى الصراحة ما اعرف ليش ما ارتاح لها احسها حركات وشايفة عمرها .
هند وهي معصبة : والله حبيبتي من لازم ترتاحيلها اهم شيء انا ارتاحلها انزين .
نورة : انزين انزين عفان الله بلاج شبيتي علينا تقولين انتي الاكبر مب كاني اكبر منج
هند وتأشر على صبعها : بسنة وحدة اكبريعني ما شيء فرق وايد
نورة : بسنة بشهر باسبوع المهم اكبر منج خلا اروح اكلم سارة احسن من مجابلة ويهج .
هند وهي منقهرة : روحي روحي وانا خلا اكلم منى احسن .
واتصلت هند في صديقتها منى . وصح كلام نورة لان منى من النوع المتكبر وايد وعليها سوالف وحركات .
هند : الو مرحبااااااااا
منى : مراحب يا هلا بهنود
هند : هلا فيج شو وينج
منى : ويني بعد في البيت قاعدة عالمسنجر
هند : انتي ما تملين من المسنجر
منى : لا والله وناسة بس انت يلو تجربين بتعرفين كيف .
هند : وين اجرب ما عندي مسنجر واصلا ما احب الكمبيوتر.
هند : لانج ما تعرفين شو داخل الانترنت حبيبتي اذا تبين تحبين وتعيشين بالغرام يلسي عالانترنيت والمسنجر .
هند وعلامة تعجب في ويها : والله كيف
منى : انتي تعالي بيتنا وبعلمج كل شيء .
هند : والله زين خلاص الحين بقول حق امايه وبيي بيتكم اوكي
منى : اوكي يالله اترياج
وطبعا هند للاسف كانت ساذجة وما تعرف صديقتها منى شو تقصد بهالكلام .

اما ريم وسارة راحو يتشرون عشان عزيمة اليوم . وهم يتشرون فجأة شافت ولد خالتها خــــــالد ومعاه صديقه محمد .
خالد وهو مستغرب ومبطل عيونه : محمد محمد مب هاي سارة .
محمد : أي سارة ؟
خالد : حبيبة القلب روحي وعمري قوم قوم خلا نروح هناك
محمد : الله يعينا على الفلم الهندي
وراح خالد ويا ربيعه محمد وخالد عيونه على سارة :
خالد بصوت ونبرات كلها حب : انا احلم ولا اتخيل سارة موجودة ؟
سارة وهي منحرجة : هلا يا خالد شفت عاد الصدفة شو اخبارك يا ولد خالتي ؟ .
خالد وفي خاطره ( لا تقولين ولد خالتي قولي خطيبي او حبيبي ): تمام يسرج الحال يا بنت خالتي .ها شو تسوون هني
ريم ,وهي تشوفه بدلع وتقول: زين قلت شو تسوون زين جمعت قلت يمكن ما شفت غير سارة .
وهني سارة ضحكت برقة وخالد استحى وقال : لا افا عليج يا ريم كيف انسى ريم صديقة سارة المفضلة
اما محمد فماكان يتكلم ولا كلمة لانه عيونه على عيون ريم ومتخبل عليها وساكت .
ريم حست بنظرات محمد واستحت وااايد اول مرة احد يشوفها بهالنظرات .
سارة : شو اخبارك محمد ؟
محمد في عالم ثاني عالم ريم .
خالد : محمد محمد وين وصلت ؟
محمد : ها شو شو شو شو السالفة ؟
خالد : نحن اللي نسألك شو السالفة وين وصل تفكيرك ؟؟؟
محمد يرمس شوي شوي ويقول لخالد : معاها معاها ما تشوف كيف حلوة ورقيقة
خالد : منو ؟؟؟
محمد : منو بعد صديقة حبيبة القلب
خالد : ريم
محمد : الله حتى اسمها حلو ريم شيخة الحريم
خالد وهو يقرص محمد : بسك فضحتنا فضحتنا .
سارة وهي مستغربة : بلاكم عن شو تتكلمون؟؟؟
خالد : هاا لا لا ما شيء ما شيء محمد يقول انه يوعان بيروح يأكله شيء.
سارة :ها خلاص عيل نحن نترخص عشان ما نتأخر اوكي يا ولد خالتي مع السلامة .
خالد : مع السلامة يا سارة واشوفج على خير
محمد وعيونه على ريم : مع السلامة سارة وووووو وو مع السلامة يا يا ريم .
ريم وهي منحرجة ومنزلة رأسها وبصوت رقيق : مع السلامة يا محمد .
وراح محمد وخالد وفرحة خالد غير لانه شاف حبيبته واما محمد فكان سرحان في ريم

سارة وهي ميتة من الضحك
ريم وهي مستغربة على سارة : شو فيج ليش تضحكين ؟
سارة وهي مبتسمة : لا حبيبتي سلامتج بس تذكرت نظرات الولهان على بعض الناس .
وهني ريم فهمت شو تقصد وابتسمت : تصدقين سارونه ما عرفت ان خالد عنده صديق بهالحلاه والجمال .
سارة : طبعا لان خالد ما يمشي الا مع الحلوين مثله
ريم : خلي عنج هالرمسة وقومي نتشرى يلا

في بيت منى صديقة هــــــند:
منى : زين والله ييتي تعالي قعدي عندي براويج اشياء تخبل.
هند : والله شو هيه؟
منى : شوفي انا اكلم واحد عالمسنجر بس شو يموت فيه اتصدقين يحبني واي شيء ابي ينفذلي.
هند : وانتي تصدقين انه يحبج حبيبتي هذا اكيد يقص عليج
منى : أي يقص علي اقولج يموت فيه بس انا مب بس اكلمه بالمسنجر اكلمه بعد بالتلفون .
هند وهي مستغربة وتشوف منى بتعجب : بالتلفون ؟ منى كيف ترضين على عمرج تغازلين .يمكن يقص عليج .
منى : والله انج فاضية شو يقص علي اقولج يحبني وينفذلي كل شيء وما انام الا بكلماته الحلوة والله حياتي صارت روعة وياه ..اااااااااه كيف احبه
هند وهي بعدها مستغربة : يعني صدق تحبينه يعني ما يقص عليج .
منى : اقولج احبه وبعد بيتزوجني تخيلي تأخذين واحد عن قصة حب والله روعة بس انتي لو تجربين هالشيء بتشوفين
هند : لا لا لا حبيبتي خليني بعيده عن هالسالفة شو تبين خالد اخوي يذبحني .
منى : وهو اصلا شو عرفه ما بيعرف عن شيء انتي بس طيعيني وكلمي واحد وبتشوفين كيف حياتج بتتغير؟
هند: كيف ارمس واحد لا لا لا ما يستوي
منى : يالغبية هاي بس فترة خطوبة بعدين هو بيتزوجك صدقيني .
هند : ها مممممممممم يتزوجني مممممممم ماعرف خليني افكر
منى : فكري يا عمري وانا بعطيج رقم صديق اللي اكلمه الحين وبتشوفين كيف حياتج بتتغيرللاحلى .
هند وهي تفكر بالسالفة : ماعرف بس بفكر .
ومنى فرحت لانها قدرت تتجذب على هند اللي بسهولة قصت عليها .

وبعد ما ردت سارة وريم من السوق كانت الساعة تقريبا 6 مساء يعني ما تأخروا وايد وكان عندهم وقت عشان يتلبسون ويتمكيجون . وسارة قررت انها تتلبس في بيت ريم عشان مرة وحدة يروحون ويا بعض لان كل اغراضها كانت وياها وراحت سارة واتلبست وكان لبسها اللون الاحمراللي ياي على شكل فستان بسيط ومكياجها بسيط وحلو وفتحت شعرها العسلي وكانت صدق كأنها الوردة بجمالها .

أما فهد اخو ريم اللي ياي من السفر كان يبي يسوي مفاجأة لاخته ريم بقدومه وكان يدور عليها وما لقاها وقال اكيد هي بغرفتها وهو ما يعرف ان سارة اللي بالغرفة وفجأة يوم دخل كانت سارة صادة لصوب المنظرة
فهد تم يصارخ من الفرحة وقال : ريماااااااااااان مفاجأة
وصدت سارهة وشافت رجل غريب ما تعرفه وهي مستحية ما تعرف شو تسوي لانها ما كانت متغطية لا بالشيلة ولا العباية وفجأة سكتت ونزلت رأسها وما تعرف شو تقول .
اما فهد فكانت بيده هدية ومن المفاجأة او من جمال سارة الهدية طاحت من ايده تلقائيا من دون قصد وتم ساكت وهو يطالعها ويقول في خاطره ( انا أحلم ولا شو السالفة؟ من هذي هاي اكيد حورية لا أي حورية اكيد ملاك ما شفت احد بجمالها وهو يطالعها وساكت وهي منزلة رأسها .
فهد بعد ما حفظ شكلها : ايييي مممممممممم اسمحيلي كنت ابي ابي ابي اختي ريم بس ما عرفت انج موجودة ؟
سارة على طول خذت الشيلة وتغطت وهي مستحية وويها صدق محمر وترد برقة : لا عادي انا الغلطانة لاني ما بندت الباب . ونزلت رأسها
فهد : اسمحيلي اختي
وطلع من الغرفة وهو حاط رأسه على ارضية غرفة اخته ويقول : واااااااااااااو شو هالجمال في حياتي ما شفت في جمالها .
وبعدين يت اخته ريم اللي ما كانت تعرف ان اخوها فهد موجود وهي يوم شافته
ريم فتحت عيونها وتمت تشوفه وتصااااارخ : فهههههههااااااااااااااااااد وتمت تصيح ويت وحضنت اخوها
ريم وهي حاضنة اخوها بالحيل وتصيح وتقول : فهد وينك فهد ليش خليتني من 4 سنين بروحي تخليت عني يا اخوي .
وتمت تصيح
وطلعت ساره من الغرفة تشوف شو سالفة هالصراخ.
فهد وهو يكلم اخته ويمسح دموعها : حبيبتي يا ريم تعرفين اني رحت اكمل دراستي .
ريم وهي تشوف اخوها بنظرة حب وشوق : للدراسة والا تشرد عشان ما تحس بالمعاناة خلاص يا فهد انسى امي وابوي راحوا من كم سنة وادعي لهم بالرحمة ... انا الحين محتاجة لك
فهد ترك يد اخته وقال وهو حزين : اااااه يا ريم محد بيحس بشوقي لامي ريم امي راحت عني وانا عمري 10 سنين وكانت بالنسبالي كل شيء ما اقدر ما اقدر بدونها اتخيلها بكل زاوية في البيت محتاج لحنانها ياريم ... ودمعت عيون فهد .
اما سارة فما قدرت تتحمل على طول دمعة نزلت بعيونها .
فهد حب يتغير السالفة : المهم ريماني انتي شو اخبارج ...؟
ريم : والله اني شوي بخير بس الحين اكيد بخير بوجودك اخوي .
ريم وهي تشوف سارة وتبتسم
وتقولها : سارة تعالي اعرفج على اخوي .
سارة منزلة رأسها ويت عند ريم وفي خاطرها تقول ( هو شافني وخلص )
ريم: فهد اعرفك على صديقة عمري واختي سارة .
فهد وهو يشوف سارة بنظرات : هلا والله بسارة تشرفت بمعرفة وحدة حلوة مثلج .
سارة استحت وما قالت شيء غير : تسلم عيونك الاحلى .
سارة استغربت من جرأته .
المهم بعد ما استأذنت ريم من اخوها انها بتروح للحفلة مع سارة .
اخوها فهد راح عند أصدقائه اللي من مدة ما شافهم .
وبخياله بس رسمة سارة اللي صدق كان متخبل عليها وقال:
قلت هي قمر قلت لا القمر ماخذ من حلاها .
كيف أوصفها وهي ما تنوصف من جمالها .
رسمة عيونها اللي تعذب المخاليق ولا ملامحها اللي فيها براءة الاطفال ولا خدودها اللي كانها ورود وردية
كيف اوصفج يا سارة كيف ؟
وفهد هو اصلا يموت على الشعرفكانت اول قصيدة يكتبها لبنت .
وربعه سمعوا الخاطرة وقاله صديقه مروان : الله عليك يا فهد شو هالكلام العذب شو اليوم ياي وتقولنا خواطر اخاف بس الاخ متعذب.
وضحك فهد وقاله : لا بس حبيت اقول خاطرة لان هالخاطرة مميزة عندي .
°
°
°
°http://www.al-wed.com/pic-vb/88.gif
يتبع

تحياتي لكم